SPD Nortorf

De Niee Straat (hütodags)
De Niee Straat (hütodags)

Na denn Krieg weer de Niee Straat immer noch een emsige Geschäftsstraat, woor ober weniger.

De Sporkass an de Eck vun de Bahnhofstraat weer een stattlich Gebüüd. De Vörgoorn weer nie mehr dor. Wie harrn twee Sporkassen in Nordörp. Neben de Sporkass geev dat de Landverbandssporkass in de lütte Möhlenstraat. De beiden hebbt siek vereent to de Sporkass Mittelholsteen und hebbt dat ole Amtsgericht afreeten und nee buut.  

In dat ole Sporkassengebüüd sind nun Dokters und een Pillendreiher bin.

Gegenöver harr Hermann Hemme mol een Tuschgeschäft und Joan Hengelmann mol een Sniederie. Nun sind dor de Advokaaten bin.

De Schoomokerladen vun Wehling möss wieken för Hallbauer sein Farben- un Tapetenladen.

In de Villa vun de ole Margarinefabrik trok een Arzt in. Op denn Hoff harr Claußen ne Wäscherie. Hüt praktezeert Dokters in de Villa.

De hütige Parkplatz von de Sporkass, de fröhere Amtsgerichtsgoorn, harr een grooten ünnererdschen Luftschutzbunker. Door hett später „Monte Pinchio" Pilze zücht.

Wo nu Deppe sien Uhrenladen hett, wer vörher Suhr bin. De bu an de Eck vun de Kirchspeelstraat een niees Hus.

Dat groote Hus vör denn Teendokter gehöör Heese. Dor ward hüt Kleeder ännert.

De Teen ward ümmer noch in dat sülbe Huus trocken un plombeert.

In denn lütten Twischenbu to dat Chinarestaurant hin, weer mol een Fohrschool und achteran ook mol ein Wäscherie bin.

Dat groote Eckhus gehört Godt mit de Möhl in de Hohenwestedter Straat. De Möhl is al lang nie meer in Betrieb. Na denn Kriech timmerte Willi Harms dor eenfache Möbel tosaam. Arsenal weer dat während des Kriechs.

Gegenöver weer de Buurnstell von Gustav Heeschen. Dat Hus is afreeten und Parkplatz vör denn Kirchspielkroog woorn.

De Kohstall vun Theo Heeschen is to een Wohnhus und Geschäftshus ümbuut woorn. Hollerbuhl is mit dat Geschäft vun Max Riepen dor introcken. Hüt kann man dor Heilgymnastik maaken.

De lütt Schosterloden steiht leer. Hier kunnst mal Böker utleehn und di ok mal friseern laten.

De Melkladen op de anner Sied gehört ton Landkroog.

Ut de Autowerkstatt is een Parkplatz woorn. Ünnererdsch is een Kegelbohn buut.

De Obstgoorn vun de ehemalige Polizeistation is nu Sarglager un Gravsteenutstellung.

Na denn Schoster kümmt de ole Stall vun Schlosser Eggers und de interessate Fassod vun Petersen sien Hus. Meister Petersen sorgt vör dat Koole und Hitte. In düt Hus weern all allerhand Ladens: Neihladen, Friseure, Fischladen, Oletüchladen und ok mol een Sexladen.

De Tabakladen vun Wommelsdörp is na de Poststraat ümtrocken. Hüt is dat een Geldberatungsbüro.

Snieder Bölck givt dat ok nie mehr. Sie Hus und de nebsten Hüüs sind nu reine Wohnhüüs woorn.

In Max Riepen sien Hus sünd nu Advokaten und Versicherungen bin.

Ernst Kruse har in de Niee Straat sein Anfang. He verköfft hier Landmaschinen un Brennstoff. He trock  naher in de Hohenwestedter Straat. Denn wör dor een Heißmangel bin.

Na denn Sattlerladen weer dat een Gardinengeschäft. Nun steiht dat leer.

„Heischi-Bäcker" hett  all lang keen Kooken mehr. Een Iisstuv is dat woorn.

 Up denn Parkplatz an de Eck weer fröher mol een Schlosser, denn Autowerkstatt, denn Fohrradladen.

Dat grote Eckhus vun Otto Ehlers is hüt een Heim vör behinderte Minschen un hört toon „Erlenhoff". Nix mehr mit Kolonialwaren und Sämerien oder dorna mit Wull.

De Opelvertretung is utsiedelt. Hüt kannst door dien Auto nee polstern laten.

De neeapostolische Karck kannst kööpen.

In denn Apothekergoorn steit jetzt een Pflegeheim.

Jo - wat hett siek de Straat verännert. Dat Koppsteenploster is bleben, aver deelwies düchti absackt.

Ne niee Straat is dat nie mehr!

 von Hans-Detlef Wommelsdorf

 
QR-Code

image

umWeltforum

image